Wie wahr - Espania

Also, uch uff die Gefahr hin, dass ihr des nitt lese könne duht, muss ich des loswerre. Die W-Ämm iss halt so, unn löst imma so mei Emmotzione, dass mir manchmol die rischtische Worte fehle duhn.
Mir spiele also am Middwoch gesche die Schpanijer. Des wirt schwer. De Karloss, dess iss mei schpanische Freund, den isch schon seit Jaazehnte kenne unn wo mir immer bei dem Urlaub mache duhn, hatt mir enn
Mail geschiggt und geschribbe, mir sollte uns warm anziehe. Unn uff die Mail hatt er schon mol so vorsorglisch enn Weltmeister – Emblemm gemacht. De alte Angebber. Abba ess iss enn netter Kerl, de Karloss. De hott jo inn Anatolien, oder waade mol, nee isch glaub Katalonien enn Kaffee unn hatt mir mol gesacht: musse immer Tasse oder Glase nicht ganze volle mache, dann du verdiene.
Isch denk abba, dass mir die Schpanijer wegbutze. Obwohl, die könne jo aach Fußball schpiele. Unn de Karloss hatt mir aach geschribbe, in welsche tolle Mannschaffte die all schpiele däte. Alles Mannschaffte
von de Tschämpjenslieg. Unn die Schpanier an sisch, die müsst ihr euch mol angugge. Die habbe all so kurze Bään, das iss, damit die schnell laufe könne, wesche der kurze Übbersetzung. So könne die dann
schnelle Schridde mache. Unn schwarze Haar habbe die. Mei
Schwieschermutter sacht immer, so ein
volles Haar unn iss ganz begeistert, aach weil die des schwarze Haar sogar noch uff de Brust habbe. Egal, unn do muss isch dem Jogi mol Recht gebbe, mir duhn gewinne. Weil, dess habb isch inn de Zeitung gelese, die Schpanier wärn lauter Indiwidualiste unn mir sinn enn Tiem. Unn Fußball iss jo aach enn Tiemschpiel.
Allän schon die Name von dene. Angebber. De ähn heißt Villa – ja Gott, muss man das dann direkt so raushänge? Isch mähn, so paar von uns habbe bestimmt aach schon Villas, abba die nenne sich weidderhin
Schweinsteischer oder Müller. Gut, da sinn jetzt beide junge, die nitt so direkt deutsch klinge. Abba die sinn all in Gelesenkirschen geboren. Vielleischt hat do damals de Rudi Assauer sei Finger – nee, dess iss en
Witz.
Egal, isch freu misch uff des Schpiel unn hab mir für Mittwoch extra freigenomme. Hauptsach, so saach isch immer, ess wärt enn schee Schpiel unn egal wer gewinne duht. Abba zuviel gewinne dürfe mir nitt,
sonst wääs isch nitt, ob isch nächst Johr nochmol zum Karloss kann. Abba so bissje gwewinne – dess wär nitt schlecht.
Viel Schpass beim Gugge.

Koperni-kuss