Margret Hölle III

S git Haisa (von Margret Hölle)

S git Haisa
in dene gaiht a Sprouch um
vu dera daschriggst
Wöerta zischn wäi vagifte Pfeil
vo oana Wänd zu da andan
d Fensta und Diirn
hom grouße Ouhawaschl
und da Schlissl is umdraaht
Owa s git aa Haisa
in derne gäiht a Sprouch um
dou lust aaf
d Wöerta hupfa wäi woame Regntropfa
aaf Diisch und Bänk
d Fensta und Diirn
homs Mail aaf
und da Schlissl glanz am Nogl